اسلام آباد (سحر نیوز) : سپریم کورٹ آف پاکستان نے پاکستان پیپلز پارٹی کے رہنما فیصل رضا عابدی(Faisal Abidi) کی توہین عدالت کیس میں معافی قبول کرلی۔ تفصیلات کے مطابق پیپلز پارٹی کے رہنما فیصل رضا عابدی کے خلاف تین رکنی بنچ نے توہین عدالت کیس کی سماعت کی۔ سپریم کورٹ نے توہین عدالت کیس میں پیپلز پارٹی رہنما فیصل رضا عابدی (Faisal Abidi) کی غیر مشروط معافی قبول کرتے ہوئے ان کے خلاف کیس ختم کر دیا۔
سپریم کورٹ نے فیصل رضا عابدی (Faisal Abidi) کو آئندہ محتاط رہنے کی ہدایت بھی کی۔ سماعت کے دوران جسٹس عظمت سعید نے کہاکہ فیصل رضا عابدی کی معافی قبول کرتے ہیں۔ معافی قبول کرنے سے فیصل رضا عابدی کے خلاف دیگر کیسز ختم نہیں ہوں گے، فیصل رضا عابدی کی معافی کا ان کے خلاف چلنے والے دیگر کیسز سے کوئی تعلق نہیں ہو گا۔
یاد رہے کہ سپریم کورٹ آف پاکستان نے 14 دسمبر کو پیپلزپارٹی کے سینئر مرکزی رہنماء فیصل رضا عابدی کے خلاف توہین عدالت کا کیس 19 دسمبر کو سماعت کے لیے مقرر کیا تھا۔
یہ بھی پڑھیں
پیپلزپارٹی کے سابق سینٹر فیصل رضا عابدی گرفتار )
واضح رہے کہ پاکستان پیپلز پارٹی کے رہنما کو اسلام آباد پولیس نے سپریم کورٹ کے باہرسے اس وقت گرفتار کیا تھا جب وہ عدالت میں پیش ہونے کے لیے آئے تھے۔ جس کے بعد پی پی پی رہنماء پی پی فیصل رضا عابدی کو اڈیالہ جیل میں قید کر دیا گیا تھا۔ یاد رہے کہ توہین عدالت کی کارروائی میں سپریم کورٹ نے مسلم لیگ ن کے مرکزی رہنماء نہال ہاشمی کے خلاف بھی ایکشن لیا تھا جس کی بنیاد پر انہیں نہ صرف گھر جانا پڑا بلکہ جیل کی سزا بھی کاٹنی پڑی تھی۔
اسی طرح ن لیگ کے متحرک رہنماء طلال چودھری، دانیال عزیز کو بھی توہین عدالت کیس میں نااہلی کا سامنا کرنا پڑ چکا ہے۔ مسلم لیگ ن کے رہنماؤں نے عدالتوں کے فیصلوں کو قبول کرتے ہوئے کہا تھا کہ پی ٹی آئی کے رہنماؤں کے خلاف بھی اسی طرز پر کارروائیاں کی جائیں۔
