اسٹیٹ بینک آف پاکستان نے 50 روپے کا نیا سکہ متعارف کروادیا

لاہور (سحر نیوز) : اسٹیٹ بینک آف پاکستان (State Bank of Pakistan) نے 50 روپے کا نیا سکہ متعارف کروادیا۔ تفصیلات کے مطابق اسٹیٹ بینک آف پاکستان (State Bank of Pakistan) کی جانب سے 50 روپے کا نیا سکہ جاری کر دیا گیا ہے۔ 50 روپے کے اس سکے کے پیچھے ’’ ہمارا ایمان، کرپشن فری پاکستان ‘‘ تحریر کیا گیا ہے۔ ذرائع کےمطابق انٹرنیشنل کرپشن ڈے کے موقع پر اسٹیٹ آف پاکستان کی جانب سے 50 روپےکا خصوصی سکہ جاری کیا گیا ، سکے کی تیاری میں خصوصی طور پر کاپر اور نکل کی دھات کا استعمال کیا گیا ۔
50 روپے کے اس سکے میں 75 فیصد کاپر جبکہ 25 فیصد نکل کی دھات کو استعمال کیا گیا۔ اسٹیٹ بینک آف پاکستان کی جانب سے جاری کر دہ اس سکے کا وزن 13.5 گرام ہے جبکہ اس کی موٹائی 30.0 ملی میٹر ہے۔ سکے کے ارد گرد اردو میں اسلامی جمہوریہ پاکستان تحریر کیا گیا ہے جبکہ سکہ نہایت خوبصورت اور دلکش ڈیزائن میں بنایا گیا ہے۔

سوشل میڈیا پر اسٹیٹ بینک (State Bank of Pakistan) کی جانب سے جاری کیے گئے 50 روپے کے اس سکے کی تصاویر بھی کافی وائرل ہوئی ہیں جس میں اس کا خوبصورت ڈیزائن نمایاں ہے۔

یہ بھی پڑھیں. حنیف محمد کی 84ویں سالگرہ پر گوگل کا خراج عقیدت

یاد رہے کہ اس سے قبل گذشتہ برس اسٹیٹ بینک آف پاکستان (State Bank of Pakistan) کی جانب سے پاکستان میں 10 روپے کا سکہ جاری کیا گیا تھا۔ یہ سکہ چاندی کی دھات سے بنایا گیا جس پر فیصل مسجد کی تصویر بنائی گئی تھی۔ جس کے بعد گذشتہ برس کے آخر میں سوشل میڈیا پر ایک نئے سکے کی تصاویر گردش کرنے لگیں۔ یہ تصاویر 100 روپے کے سکے کی تھیں۔ سوشل میڈیا پر دعویٰ کیا گیا تھا کہ اسٹیٹ بینک کی جانب سے 100 روپے کا سکہ تیار کر لیا گیا ہےجو کہ جلد مارکیٹ میں دستیاب ہوگا۔ تاہم اس حوالے سے اسٹیٹ بینک کی جانب سے تاحال کوئی وضاحت یا تصدیق نہیں کی گئی۔ اور یہ تمام خبریں افواہیں ثابت ہوئی تھیں