لاہور(سحر نیوز) سابق وزیراعظم نواز شریف (Nawaz Sharif) نے کہا ہے کہ اقتصادی راہداری (سی پیک) کے لئے سردھڑ کی بازی لگائی تاکہ ملک خوشحال ہو، اب اگر اسے روکا جاتا ہے تو ملک کو بہت نقصان ہوگا، ملک میں معاشی ترقی و خوشحالی کے لئے جو اقدامات کئے اب حالات دیکھ کر افسوس ہوتا ہے، حکومت کو چاہئے کہ وہ عوامی مشکلات کے پیش نظر ملتان موٹروے فوری طور پر کھول دے.
کوٹ لکھپت جیل لاہور میں پارٹی راہنماﺅں اور کارکنوں سے ملاقات کے دوران انہوں (Nawaz Sharif) نے ملاقاتیوں کی فہرست کی تردید کرتے ہوئے کہا کہ کسی رہنما یا کارکن سے ملاقات کےلئے مجھے کوئی لسٹ نہیں دکھائی جاتی اور نہ ہی مجھ سے اجازت لی جاتی ہے، مجھ سے ملنے جو بھی آتا ہے اسے خوش آمدید کہتا ہوں. نوازشریف نے سانحہ ساہیوال پر افسوس کا اظہار کرتے ہوئے کہا کہ تصدیق کئے بغیر بے گناہوں کا خون نہیں بہانا چاہیے تھا، چاہتا ہوں واقعے کی شفاف تحقیقات ہوں، موجودہ حکومت کی عوام دشمن پالیسیوں کو سن کر افسوس ہوتا ہے.
سابق وزیراعظم نواز شریف (Nawaz Sharif) نے کہا کہ موجودہ حکومت کی عوام دشمن پالیسیوں پر افسوس ہوتا ہے‘ کوٹ لکھپت جیل میں مسلم لیگ (ن) کے قائد نوازشریف ملاقات کرنے والوں میں خرم دستگیر، طلال چودھری، مفتی اسماعیل، پرویز رشید، عظمی بخاری اور کارکنان شامل ہیں. قبل ازیں اطلاع سامنے آئی تھی کہ نوازشریف کی والدہ بھی آج ان سے ملاقات کے لیے جیل آئیں گی.
ذرائع کے مطابق لیگی راہنماﺅں نے نواز شریف کی خیریت اور صحت دریافت کی تو انہوں نے اپنی صحت کا حال غالب کے شعر کی صورت میں سناتے ہوئے کہا کہ ان کے دیکھے سے جو آجاتی ہے منہ پر رونق ، وہ سمجھتے ہیں کہ بیمار کا حال اچھا ہے. انہوں نے کہا کہ صحت بالکل ٹھیک ہے اور حوصلے بلند ہیں. قبل ازیں جیل کے باہر صحافیوں سے گفتگو کرتے ہوئے مسلم لیگ نون کے راہنما پرویز رشید نے کہا کہ نواز شریف کو علاج کی ان سہولتوں سے محروم رکھا جارہا ہے جوہرقیدی کا حق ہیں،جوحق قوانین تمام قیدیوں کودیتے ہیں ان کے تحت نوازشریف کو بھی یہ حق دیا جائے.
یہ بھی پڑھیں.آرمی چیف بھی عمران خان کے گن گانے لگ گئ
پرویز رشید نے کہا کہ نوازشریف (Nawaz Sharif) کی صحت سے متعلق عوام تشویش میں مبتلا ہیں ،ان کے ذاتی معالج کوبھی ان تک رسائی دی جائے تاکہ عوام کی تشویش غصے میں نہ بدلے. مسلم لیگ( ن) کی راہنما عظمی بخاری نے کہا کہ میاں صاحب کے بارے میں تشویشناک رپورٹ آرہی ہیں، ڈاکٹر جو رائے دے رہے ہیں ان پر عملدرآمد نہیں کیا جارہا،پنجاب حکومت رپورٹس کو انکی فیملی کے ساتھ بھی شیئر کرے. یاد رہے کہ نواز شریف العزیزیہ ریفرنس میں احتساب عدالت کی جانب سے دی گئی 7 سال قید کی سزا کاٹ رہے ہیں، انہیں اسلام آباد کی احتساب عدالت نے 24 دسمبر کو قید کی سزا سنائی تھی. نوازشریف کو ان کی درخواست پر اڈیالہ جیل روالپنڈی سے کوٹ لکھپت جیل لاہور منتقل کیا گیا تھا.
